Sonetler

Скачать

Vilyam Şekspir. Seçilmiş əsərləri. İki cilddə. II cild. “Öndər nəşriyyat”, Bakı, 2004, 304 səh.

Gözəllik hifz edir öz surətini,

Gülüm, gözəlliklə həyat qoşadır.

Solan çiçəklərin təravətini

Qönçə çiçəklərin hüsnü yaşadır.

Fəqət sən vurulub öz gül hüsnünə,

Onu xərcləyirsən boş yerə, əbəs.

Ən qəddar düşmənsən özün özünə,

Varını yoxluqla edirsən əvəz.

Bu gün dünyamızın zinəti sənsən,

Bahar müjdəsisən, qönçəsən artıq.

Özündə özünü dustaq edirsən,

Nədir bu simiclik, bu israfçılıq?

Rəhm elə dünyaya, gözəlliyi, gəl,

Özünlə məzara aparma, gözəl.

Qocalıq üstünə hücum edəndə

Vaxt da gül üzündə qazacaq səngər.

Gözəlliyin tül tək solub gedəndə

Canından hürküb diksinəcəklər.

Deyəcəklər: hanı büllur xəzinən —

Keçmiş gözəlliyin, zavallı insan? —

O, sönmüş gözümdə gizlənib, desən,

Özün öz sözündən utanacaqsan.

Gül tək balaları göstərib bir-bir,

İftixarla desən: bu gözəl gənclər

Mənim gəncliyimdir, gözəlliyimdir.

Deməli, döyüşdə sənindir zəfər.