Былдьаама, дьылҕам, тапталбын

Начало книги

Петр Николаевич түүн ортото эмискэ уһугунна. Тута илиитинэн кэргэнин оннун бигээн көрдө. Сөрүүн кураанах бырастыына тымныынан хаарыйда… Эр киһи туох эрэ куһаҕаны биттэнэн, хаана биирдэ төбөтүгэр ыга анньан чэчэгэйин ыарыылаахтык кэйиэлээтэ, сүрэҕэ күүскэ тэбиэлээтэ, түөһэ хаҕыс аһыынан нүөлүйдэ…

– Лиза? Лизаа-а… – атын хоско утуйа сытар оҕолорун уһугуннарымаары, оргууй кэргэнин ыҥырда. Эппиэт суох.

Сааланы, куукунаны өҥөйөн көрдө. Дьиэҕэ суох. Кураанах. Тыый, бачча тымныыга түүннэри таһырдьа туохха таҕыстаҕай? Көхөҕө ыйанан турар дьиэ таһыгар кэтэр кууркатын харбаат, таһырдьа ойон таҕыста. «Лиза-а, Ли-иза-а!» – хаһыытыы-хаһыытыы олбуорун биир гына тилийэ сүүрдэ. Аа-дьуо, сымнаҕас сыа хаар түһэн наскыйар. Уруккуну барытын бүрүйэн, мэлдьэһэн, ыраастаан кыстык хаар сири үрүҥ көбүөрүнэн тэлгээбит. Бүөтүр хараҕын уута сирэйинэн сылаас сүүрүк буолан таммалыырыгар аахайбакка, барыах-кэлиэх сирин билбэккэ, өр дөйүөрэн турда. Онтон ким эрэ сирдээбитинии, олбуорун аанын аһан күөл диэки сүүрдэ.

Читать дальше →